UEFA do të dërgojë përfaqësues për të verifikuar korrektësinë e zgjedhjeve në FSHF dhe në rast se do të ketë ndërhyrje të politikës rrezikohet zhvillimi i finales së Conference League në Tiranë.

Kjo u deklaruar nga Presidenti i UEFA-s, Alexander Ceferin gjatë vizitës që ka zhvilluar të enjten në Shqipëri ku u takua me kryeministrin Edi Rama dhe kreun e FSHF, Armand Duka.

Sipas Ceferin, futbolli duhet të vendosë për futbollin dhe se nuk duhet të ketë ndërhyrje politike.

“Ishim të pak të shqetësuar për situatën sipas raportimeve që kemi lexuar në media. Jam i kënaqur që ramë dakord me Kryeministrin, që futbolli duhet të vendosë për futbollin”, tha kreu i UEFA-s gjatë një interviste për ‘Associated Press’.

Ceferin tha se nëse nuk do të ketë ndërhyrje politike nuk do të rrezikohet zhvillimi i finales së parë historike të UEFA Europa Conference League në Tiranë.

“Nëse gjërat do të jenë kështu dhe unë kam shumë besim në fjalët e Kryeministrit, atëherë zhvillimi i finales së Conference League këtu është i sigurt”, përfundoi Presidenti i UEFA-s.

Kreu i qeverisë Rama në një reagim pas takimit me Ceferin thotë se do të realizohet një proces i besueshëm për të gjitha palët e përfshira në zgjedhjet e reja të FSHF.

Takimi sot me Presidentin e UEFA-s s’mund të ishte dot më i mirë për qëllimin e përbashkët tê zhvillimit në Tiranë të finales së parë europiane në histori, si dhe të realizimit të një procesi të besueshëm për të gjitha palët e përfshira në zgjedhjet e reja të #FSHF⚽️ #FairPlay

— Edi Rama (@ediramaal) February 3, 2022

Finalja e UEFA Europa Conference League për sezonin 2021-2022 është parashikuar që të luhen në “Arena Kombëtare” në Tiranë më 25 maj.