Rama e Meta sërish replika mbi çështjen “Albcontrol”

Çështja e menaxhimit të trafikut ajror në aeroportin e Rinasit ka përplasur sërish Presidentin Ilir Meta dhe Kryeministrin Edi Rama.

Meta kërkoi auditim të kompanisë Albcontrol nga Kontrolli i Lartë i Shtetit, ndërsa Rama e cilësoi kërkesën e tij të kotë.

Presidenti i ka kërkuar KLSH-së të ketë vëmendje kryesore:

• mënyrën e menaxhimit të Albcontrol;
• respektimin e dispozitave ligjore në vendimmarrjet e organeve drejtuese;
• përdorimin e fondeve publike;
• respektimin e procedurave në marrëdhëniet e punës, si dhe çdo aspekt tjetër që paraqet rrezik për veprimtarinë e sigurt dhe funksionimin normal të Albcontrol.

Presidenti u shpreh se “po ndjek me vëmendje zhvillimet e fundit në lidhje me menaxhimin e situatës në aeroport”.

Meta vuri theksin se palët “duhet të respektojnë të drejtat dhe detyrimet reciproke, pa tejkaluar në mënyrë shproporcionale me reagimin e tyre, përgjegjësitë ligjore mbi këtë rast”.

Kryeministri Edi Rama reagoi duke i konsideruar “dokrra” kërkesat për auditim dhe reflektim nga Presidenti Meta.

Ai e cilësoi sërish problematikën e krijuar në menaxhimin e trafikut ajror “të nxitur” nga Meta dhe opozita, ndërsa këmbënguli se situata do të zgjidhet duke nisur nga nesër.

Ilir kam një lajm të keq për ty: Vaksinat vijnë sot dhe fluturimet rifillojnë normalisht nesër! Plani yt me Saliun për bllokimin e vaksinimit e rikthimin e Rrunpallës në prag të zgjedhjeve dështoi! Dokrrat me reflektime e auditime, vazhdoji me Leshkon dhe Leskon në skutat e OFL!

— Edi Rama (@ediramaal) April 8, 2021

LEXONI GJITHASHTU:

• Mbi 100 qytetarë presin në aeroportin e Rinasit për të vijuar udhëtimet
• Balluku: Sot nisin fluturimet esenciale nga aeroporti i Rinasit
• Prokuroria ngre akuzë për tre kontrollorë të trafikut ajror, lihen të lirë të tjerët
• Balluku: Situata në Rinas për të prishur imazhin e vendit dhe për të bllokuar vaksinat