Presidentja Osmani thirrje punonjësve në arsim: Greva të zëvendësohet me dialog

Presidentja e Kosovës, Vjosa Osmani u ka bërë thirrje punonjësve të arsimit në vend, që grevën në të cilën kanë hyrë, ta zëvendësojnë me dialog.

Përmes një postimi në rrjetet sociale, Osmani u shpreh se çdo veprim i institucioneve dhe sindikatave duhet të jetë në shërbim të nxënësve dhe përmirësimit të cilësisë së sistemit arsimor.

“Si Presidente e vendit, jam për përmirësimin e pozitës së mësimdhënësve dhe rritjes së cilësisë në arsim duke e ditur se arsimi cilësor është bazamenti i një shteti e shoqërie të suksesshme. Por, jam në anën e nxënësve. E drejta u takon vetëm atyre! Atyre duhet t`ua ofrojmë dhe mbrojmë të drejtën për edukim dhe arsimim! E grevës duhet t`ia zë vendin dialogu”, shkruan ndër të tjera Osmani.

Më herët, Kryetari i Sindikatës së Bashkuar të Arsimit në Kosovë, Rrahman Jasharaj deklaroi se greva do të vazhdojë.

Jashari nënvizoi se mësuesit kërkojnë 100 euro shtesë në paga, për shkak të rritjes së çmimeve.

Ai bëri të ditur se ata kanë kërkuar dialog me kryeministrin Albin Kurti, por sipas tij, kreu i qeverisë nuk i ka dëgjuar kërkesat e tyre.

LEXONI GJITHASHTU

• Punonjësit e arsimit në Kosovë vijojnë grevën: Nxënësit të mos shkojnë në shkolla
• Mësuesit në Kosovë duan 100 euro shtesë në pagë, paralajmërojnë grevë më 25 gusht