Prezantohet “e-Transport”, pritet të ndryshojë rrënjësisht transportin në Shqipëri

Transporti ndërqytetës i udhëtarëve do të ketë tashmë platformën elektronike “e-Transport”. Si një projekt i nisur nga ministria e Infrastrukturës dhe Drejtorisë së Përgjithshme të Shërbimeve të Transportit Rrugor (DPSHTRR), në bashkëpunim me Agjencinë Kombëtare të Shoqërisë së Informacionit (AKSHI), “e-Transport” do të krijojë një standard të ri të eksperiencës së udhëtimit me linjat e transportit ndërqytetës.

Drejtuesja e Përgjithshme e AKSHI-t, Mirlinda Karçanaj e vlerësoi platformën si një prej projekteve që do të ndryshojë faqen e transportit njëherë e përgjithmonë në Shqipëri.

“Qytetarët do të kenë mundësi që t’i presin biletat online përmes telefonit me ‘QR-code’, të shohin gjeo-vendndodhjen e stacioneve, oraret, kryqëzimin e linjave. Nga ana tjetër, tregu në fjalë do të përdorë platformën për të monitoruar burimet e veta në terren, për të aplikuar online për licensimin e shoqërive dhe certifikimin e mjeteve, do të formalizojë tregun e transportit, çka do të rrisë cilësinë e shërbimit për qytetarët,” – tha drejtuesja Karçanaj në prezantimin e platformës, ku morën pjesë zëvendësministri Etjen Xhafaj, drejtuesja e Tatimeve Delina Ibrahimaj dhe drejtori i DPSHTRR Blendi Gonxhe.

Në platformën e-Albania, DPSHTRR ofron tashmë 49 shërbime, nga aplikimi për marrjen e lejes së drejtimit, tek leja e qarkullimit, certifikata e pronësisë së mjetit, aplikimi për t’u pajisur me targë apo kontrolli në kohë reale i pikëve të drejtuesit të mjetit. Aktualisht, vetëm për shërbimet e DPSHTRR janë bërë rreth 2 milionë aplikime online, nga të cilat janë gjeneruar rreth 600 mijë dokumente me vulë elektronike.

Qytetarët kanë kursyer 120 milionë lekë nga xhepat e tyre, pa llogaritur këtu kohën në pritje apo ecejaket nëpër sportele.

“Procesi i punës është automatizuar dhe sistemet janë integruar në një të vetëm. Konkretisht kemi investuar në sallën e monitorimit si fjala e fundit e teknologjisë për modernizimin informatik të monitorimit, duke garantuar një proces transparent dhe objektiv për kandidatin dhe autoshkollat,” – vijoi Karçanaj.

Drejtuesja e AKSHI-t tregoi se është digjitalizuar arkiva fizike dhe përmes sistemit të ri sigurohet më mirë fiskalizimi.