Pritet të hiqet kushti me 3 doza vaksinash për t’u futur në Kosovë

Ditën e sotme Komiteti për Koordinimin dhe Vlerësimin e Situatës me pandeminë do të rishikojë masat e vëna nga qeveria e Kosovës më 22 janar.

Burime të Euronews Albania pranë Ministrisë së Shëndetësisë bëjnë me dije se ora policore do të hiqet bashkë me kërkesën për 3 doza vaksine për të kaluar kufirin.

Ndërkohë do të hapen kinematë, teatrot dhe palestrat. Në 24 orët e fundit në Kosovë u regjistruan 2590 raste pozitive me COVID-19.

Aktualisht, çdo person i cili hyn në Kosovë duhet të posedojë certifikatën e vaksinimit me tri doza, ose edhe me dy doza, por me një test PCR negativ të 48 orëve të fundit.

Nga ky vendim nuk preket personat që hyjnë tranzit, diplomatët e huaj, fëmijët nën 12-vjeç, e ata që kanë dëshmi mjekësore se janë të liruar nga vaksinimi.