Projeksionet e BERZH për Shqipërinë, Meta: Koha për të parandaluar rënien në humnerë

Banka Europiane për Rindërtim dhe Zhvillim (BERZH) ka mbajtur të pandryshuar pritshmërinë për ecurinë ekonomike të vendit në vitin 2020, për një rënie prej -9%, duke ulur ndjeshëm edhe parashikimin për rritjen ekonomike vitin e ardhshëm.

Në raportin “Perspektiva Ekonomike Globale në rajonet e BERZH”, thuhet se ekonomia shqiptare pas rënies me 9% në vitin 2020 pritet që të rritet me vetëm 4.5% në vitin 2021.

Këtë projeksion aspak optimist për ekonominë tonë e ka komentuar edhe Presidenti i Republikës, Ilir Meta. Ai thotë se parashikimi i Bankës Europiane për Rindërtim dhe Zhvillim tregon një panoramë të zymtë për të ardhmen e afërt të ekonomisë.

“Banka Europiane për Rindërtim dhe Zhvillim ka bërë së fundmi një parashikim të zymtë për të ardhmen e afërt të ekonomisë shqiptare, më negativi jo vetëm për vendet e Ballkanit, por për të gjithë rajonin e BERZH”, theksoi Meta në “Facebook”.

Kreu i shtetit shprehet se për të parandaluar situatën e vështirë, duhet që strukturat shtetërore të marrin masa konkrete, ndërsa apelon që palët t’i përmbahen marrëveshjes së 5 qershorit.

Sipas Metës kjo është qasja kryesore, që duhet të ndiqet nga subjektet politike, me qëllim ruajtjen e stabilitetit ekonomik.

“Në këto kushte çdo përshkallëzim i mëtejshëm i krizës politike në vend, do rrezikonte seriozisht stabilitetin dhe pasigurinë për qytetarët. Koha për parandalimin e rënies në humnerë është tani! Ndaj respektimi i Marrëveshjes së 5 Qershorit, është kyç për stabilitetin politik, por edhe për ekonominë kombëtare dhe atë të çdo familjeje shqiptare”, shton ai.

Lexoni gjithashtu: 

Ekonomia bie me 9%, BERZH: Shqipëria me rënien më të madhe në rajon