Iu kapën rreth 300 mijë euro kesh, katër vite më parë pronari i kompanisë qe arrestuar për trafik droge

Pronari i kompanisë transportuese në kamionët e së cilës policia kapi të premten rreth 300 mijë euro kesh të fshehura rezulton të jetë me precedencë penale.

Euronews Albania ka mësuar se Erjon Jovani, 36-vjeç, pronar i kompanisë Auto-Okazion, qe arrestuar në vitin 2016 për faktin se në një prej kamionëve të firmës qe kapur një sasi prej rreth 190 kilogramësh kanabis.

Gjykata e Shkallës së Parë e ka dënuar atë për trafik droge e kryer në bashkëpunim me drejtuesin e kamionit, mirëpo dy vite më vonë, në vitin 2018 Jovani fitoi lehtësim dënimi kur Gjykata e Apelit e rrëzoi akuzën për trafik droge duke lënë si dënim vetëm “moskallëzimin e krimit”.

Argumenti kryesor i gjykatës ishte se prokuroria nuk arriti ta vërtetonte akuzën e trafikut.

Tashmë Jovani është shpallur në kërkim nga policia pasi të premten dy drejtues kamionësh të kompanisë së tij, e cila importon makina, kryesisht nga Italia, u pikasën në portin e Durrësit me një sasi prej 295 mijë eurosh kesh të padeklaruara.

Lexoni gjithashtu:

Durrës, kapen 294 mijë euro të fshehura në dy kamionë që transportonin makina nga Italia