Pronarit shqiptar i bëjnë pritë përpara lokalit, e qëllojnë dy herë me thikë

Një shtetas shqiptar 42-vjeçar, pronar i një lokali në qytetin e Vicenzas në Itali, është zënë në pritë nga një i panjohur, i cili e ka plagosur rëndë me dy plagë me thikë.

Ngjarja ka ndodhur pasditen e të premtes, teksa 42-vjeçari shqiptar ka qenë duke hapur biznesin e tij ‘Seven Lounge bar’. Pas tij u shfaq një burrë, nga të dhënat paraprake me kombësi italiane, i cili e ka sulmuar me një thikë të madhe.

Pronari është goditur në pjesën e shpatullës, ku thika i ka prekur dhe mushkëritë. Gjithashtu ai ka marrë dhe një goditje në lartësinë e kofshës.

Pavarësisht plagëve të rënda, shqiptari ka arritur t’i telefonojë një familjari që jeton jo shumë larg dhe ka dhënë alarmin, duke marrë në kohë ndihmën e nevojshme.

Karabinierët, sipas asaj që raporton Ansa kanë arritur të bëjnë të mundur identifikimin e agresorit përmes pamjeve filmike. Po vijon puna nga ana e autoriteteve për të bërë të mundur kapjen e tij.

42-vjeçari ndodhet i shtruar në spitalin e Viçenzës, në gjendje të rëndë, por jo në rrezik për jetën.