Propozimet për integrimin, Ilir Meta dënon sjelljen e Ramës: Minon dialogun!

Presidenti i Republikës, Ilir Meta, ka pritur në një takim ambasadorin e Mbretërisë së Bashkuar në Tiranë, Duncan Norman. Lajmi bëhet i ditur nga Meta, i cili me një reagim në “Facebook” ka falënderuar diplomatin britanik për angazhimin e tij, që palët politike në Shqipëri të vijojnë me reformën zgjedhore.

“Kënaqësi të takoja sot Ambasadorin e Britanisë Madhe, Sh.T.Z Duncan Norman. E falenderova për angazhimin e Tij të përkushtuar dhe vendosmërinë për të ndihmuar të gjitha palët për miratimin sa më parë të Reformës Zgjedhore”, shkruan Meta.

Presidenti Meta, i është përgjigjur gjithashtu kryeministrit Edi Rama, ndërsa thotë se sjellja e tij karshi platformës së propozuar për axhendën europiane nuk është e denjë dhe tepër destruktive.

“Theksova angazhimin tim për Platformën (Non Paper) të 8 prillit të bërë publike sot me qëllim avancimin e axhendës së integrimit të Shqipërisë në BE, si dhe kërkova një qasje gjithëpërfshirëse dhe vullnet konstruktiv të të gjitha palëve të përfshira. Gjithashtu shpreha keqardhjen për mënyrën destruktive të sjelljes ndaj këtij propozimi, duke minuar mundësitë për dialog”,  shprehet Meta.