Protesta e naftëtarëve, Ëngjëllushe Zenelaj: Vetëm roli rregullator i shtetit mund t’i japë zgjidhje situatës

Pedagogia nga Ballshi, Ëngjëllushe Zenelaj në një intervistë për Euronews Albania foli më tepër rreth protestës së naftëtarëve të cilën e konsideroi një ngjarje të rëndësishme për të cilën nuk duhet heshtur.

Si një person që është marrë me problematikën e naftëtarëve që në gjenezë, ajo konfirmoi se kjo situatë ka nisur që prej shitjes së uzinës.

Zenelaj foli gjithashtu rreth kritikave të njerëzve që akuzojnë naftëtarët për situatën në të cilën gjenden, duke theksuar se edhe sikur problemi të jetë tek naftëtarët shteti është në mes për të vënë në funksion rolin rregullator të tij.

“Është shitur (rafineria e naftës) kompani pas kompanie pa një transparencë të qartë, pra këta naftëtarët, këta punonjësit janë të fundit që e marrin vesh ose nuk e marrin vesh fare se ku përfundojnë. Këtyre (naftëtarëve) thjesht ju serviret një kontratë përpara por nuk kanë asgjë më tepër, asnjë informacion më tepër “,- tha ajo.

Ajo çfarë pedagogia e konsideroi si anormale është dhe heshtja e institucioneve shtetërore apo heshtja e përfaqësuesve ligjor të kompanive.

Në fjalën e saj pedagogia solli në vëmendje se industritë e naftës dalin në çdo vend me fitim, vetëm në Shqipëri dalin me humbje dhe sqaroi për Euronews Albania se pagat janë të prapambetura që nga viti 2015.

Znj. Zenelaj solli dhe një herë në vëmendje faktin që këta punonjës kanë fituar gjyqin dhe vendimi i gjykatës për të marrë pagat e tyre nuk po respektohet.

“Kush janë këto institucione që ngrihen mbi vendimin e një gjykate?” – u shpreh Zenelaj.  

E pyetur nëse mendon se shteti ka diçka në dorë për t’i dhënë zgjidhje një herë e mirë situatës, ajo u shpreh e bindur se roli rregullator që shteti ka mund t’i japë fund këtij problemi. Ndër të tjera ajo përmendi se shteti minimalisht duhet t’i ulë palët në tryezë për aq kohë sa punonjësit e një kompanie dalin në mënyrë kaq të shpeshtë në protestë.

Lexoni gjithashtu: 

Naftëtarët e Ballshit në grevë, Sokol Dautaj: Jemi rrugëve dhe pa asnjë përkrahje ekonomike

Naftëtarët në grevë urie, pas dy javë protestash për rrogat e prapambetura

Protesta e naftëtarëve, Dautaj: Nuk janë përmbushur asnjë nga detyrimet, kërkojmë përgjigje finale