Gjobitja e qytetarëve, protesta kundër masave anticovid në Prishtinë

Policia ndaloi disa aktivistë të Partisë Socialdemokrate, pasi organizuan aksion simbolik para stacionit policor në qendër të Prishtinës. Mes të prangosurve është edhe kryetari i PSD-së, Dardan Molliqaj, bashkëshorti i ish-ministres së Arsimit të Shqipërisë, Besa Shahini.

Protesta ishte për të kundërshtuar gjobat ndaj qytetarëve, ndërsa partitë politike vazhdojnë takimet para fushatës, duke mos respektuar masat anti-covid.

Policia reagoi menjëherë pasi protestuesit shkruan në murin e stacionit policor, parullën “Për partitë tubime për qytetarët dënime”.

Në fakt tubime paraelektorale, po mbajnë liderët e të gjitha partive, përfshirë edhe vetë kryeministrin Avdullah Hoti.

Madje partinë e këtij të fundit, LDK-në, Inspektorati i Komunës së Prishtinës, e ka dënuar me dy mijë euro, për mosrespektim të masave anticovid.

Bazuar në raportet e përditshme të Policisë, rreth 800 gjoba u shqiptohen qytetarëve për mos mbajtje të maskave si dhe për tubime me më shumë se pesë persona. Ndërkohë, liderët e vendit vazhdojnë tubimet në ambiente të mbyllura e pa përfillur masat strikte anticovid.