Protesta në Shkodër, shoqërohen 2 të mitur, kishin me vete shishe me benzinë

Gjatë protestës së sotme në Shkodër për vrasjen e Klodian Rashës nga një efektiv policie janë shoqëruar 2 të mitur. 

Mësohet se efektivët e policisë kanë shoqëruar dy djem të moshave 13 dhe 15-vjeç, të cilët janë kapur me shishe me benzinë.

Ata janë pikasur pranë prefekturës dhe pas ndjekjes nga ana e forca të policisë janë arrestuar në afërsi të gjykatës.

“Shërbimet e Policisë, gjatë monitorimit të tubimit konstatuan dy të mitur 13 e 15 vjeç, të cilët kishin me vete një shishe benzinë që dyshohet se do ta përdorinin për djegie gjatë tubimit. Të dy të mitur janë shoqëruar në ambjentet e Komisariatit të Policisë Shkodër, ku është thirrur psikologu i DVP Shkodër dhe prindërit e tyre për veprime të mëtejshme”, njofton policia. 

Protesta e sotme ishte e qetë dhe në të ishin të pranishëm, aktorë, përfaqësues të Shoqërisë Civile, qytetarë dhe të rinj të forumeve rinore.

Kjo është protesta e dytë që zhvillohet në Shkodër për vrajsen e 25-vjeçarit. 

Marshimi i të shtunës së kaluar, përshkallëzoi në dhunë kur një grup të rinjsh iu drejtuan godinës së Partisë Socialiste në këtë qytet.

Këta të fundit shkatërruan godinën dhe i vunë flakën orendive të saj.

Për tensionet në Shkodër, Policia ka proceduar penalisht kryetaren e bashkisë, Voltana Ademi dhe 7 persona të tjerë si organizatorë të protestës.

Lexoni gjithashtu:

Nis protesta në Shkodër për vrasjen e Klodian Rashës, policia rrethon bashkinë dhe prefekturën