Protesta në Spanjë, qytetarët mbështesin Sanchez: Hetimi për gruan s’i cënon figurën

Disa mijëra qytetarë mbushën rrugët e Madridit të shtunën në mbështetje të kryeministrit spanjoll Pedro Sanchez.

Ai e la vendin në ankth ditën e mërkurë, kur deklaroi se mund të dorëhiqej, njoftim i nxitur nga një hetim për korrupsion i nisur ndaj bashkëshortes së tij, Begonja Gomez.

Zëvendës kryeministrja e Spanjës, Maria Jesus Montero u tha anëtarëve të partisë se ajo, sikurse protestuesit, beson në aftësinë e Sanchez për të udhëhequr vendin.

“Një mesazh që do të kalojë muret e kësaj dhome me njerëz dhe që do të reflektojë ndjenjat e miliona qytetarëve progresivë në këtë vend. Kryeministër, qëndro! Pedro, qëndro! Ne jemi me ty”, deklaroi Maria Jesus Montero, zëvendës kryeministre e Spanjës.

Komentet vijnë teksa Partia Socialiste e Spanjë zhvilloi të shtunën një takim të Komitetit Federal, ku anëtarët i bënë thirrje kryeministrit të qëndrojë në detyrë.