Protesta për Klodianin, familjarët dhe avokatët akuzojnë policinë për ndalime të paligjshme

Gjykata e Tiranës u blindua për ditën e dytë radhazi nga policia ndërsa rreth 50 të arrestuar priten të njihen me masën e sigurisë.

Familjarë të cilët qëndrojnë në ankth në pritje të fatit të të afërmve të tyre pretendojnë se policia i ka arrestuar me pa të drejtë.

“Padrejtësisht e kanë mbajtur. Të ma argumentojnë që e kanë marrë duke prishur apo duke thyer diçka. Le të ma faktojnë”, shprehet nëna e një prej të ndaluarve.

“Kam shkuar dhe në Durrës për t’i dërguar bukë. Më thanë ka gjyq të dielën por sot e hënë dhe akoma nuk di gjë. Nuk e di as ku është”, shprehet një prind.

Edhe avokatët që asistuan në seanca thonë se prokuroria që në shumicën e rasteve ka kërkuar arrest me burg, nuk ka paraqitur prova por vetëm raportet e shërbimit të punonjësve të policisë.

“Nuk kishte prova të mjaftueshme për asnjërin prej tyre. Deri tani e vetmja provë që qarkullon nëpër dosje është raporti i shërbimeve që bëjnë vetë punonjësit e policisë. Nuk ka foto nuk ka asgjë, nuk ka asnjë element që të hedhë dritë mbi ndonjë dyshim që ata kanë bërë kundërshtim të punonjësit të policisë siç është një prej akuzave.

Madje duket të themi që vetë manifestimi i paligjshëm nuk ka organizator dhe nuk pretendohet të ketë një organizator nga prokuroria. Nuk ka ndonjë vend të caktuar për organizimin e manifestimit siç e kemi parë është bërë në vende të ndryshme”, deklaroi Dorian Matlija, avokat.

Të dielën gjykata e Tiranës la në burg 3 persona, për 5 të tjerë vendosi arrest në shtëpi ndërsa për 9 shtetas u vendos detyrim paraqitje.