Protestat në Iran hyjnë në javën e katërt

Presidenti iranian, Ebrahim Raisi, ka thënë të shtunën se studentët e shtetit nuk do të lejojnë “që ëndrrat e rreme të armikut të bëhen realitet”.

Ai i ka bërë këto deklarata teksa protestat në Iran – pas vdekjes së 22-vjeçares Mahsa Amini – kanë hyrë në javën e katërt, shkruan Radio Evropa e Lirë.

Amini vdiq më 16 shtator, pas arrestimit nga policia për moral, në Teheren, me akuzën se nuk e ka vendosur si duhet hixhabin.

Përplasjet mes policisë dhe protestuesve kanë rezultuar me disa persona të vdekur.

“Armiku ka besuar se mund të përmbushë dëshirat e veta nëpër universitete, duke mos e ditur se studentët dhe profesorët tanë janë të vetëdijshëm për situatën dhe nuk do të lejojnë që të realizohen ëndrrat e rreme të armikut”, ka thënë Raisi, sipas një deklarate të lëshuar nga Presidenca iraniane.

Raisi i ka bërë këto deklarata pas pjesëmarrjes në një ceremoni për nisjen e vitit të ri akademik në universitetin Al-Zahra në Teheren.

Ky universitet është vetëm për gratë dhe është themeluar më 1964.

Akademikët “me siguri që do të mposhtin armikun në fushën e shkencës, si dhe në fushat tjera”, ka thënë ai.

Ditë më parë, agjencia e lajmeve, Fars ka raportuar se studentet e Universitetit Al-Zahra janë mbledhur si shenjë proteste për të mbështetur Aminin.

LEXONI GJITHASHTU:

• VIDEO | Televizioni iranian hakerohet live nga protestuesit, ndërpriten lajmet
• Protestat në Iran, tre të vrarë nga forcat e sigurisë
• Dhuna në protestat për hixhabin, SHBA sanksionon 7 zyrtarë iranianë