Pse nuk po regjistrohen shqiptarët? INSTAT shtyn sërish procesin

Shqipëria dështoi për të tretin vit me radhë që të realizojë regjistrimin e popullsisë. Procesi i parashikuar për në 2020 u shty për shkak të pandemisë dhe pritej që të niste në tetor të këtij viti.

Megjithatë, regjistrimi u shty edhe këtë here dhe arsyeja zyrtare që jepet nga INSTAT është teknike, dështimi i tenderit të pajisjeve logjistike.

Tenderi i hapur më 17 mars të këtij viti me vlerën 233 milionë lek për blerjen e 8080 tabletëve që do të shërbenin për regjistrimin u anulua në korrik. Vendimi i anulimit nga Komisioni i Prokurimit Publik lidhet me teknikalitetet e ofertës që u shpall fituese.

Pengesat në realizimin kanë qenë të brendshme dhe të jashtme. Të brendshmet janë burokratike dhe politike, që lidhet me numrin e zgjedhësve.

Të jashtmet kanë mbërritur nga Brukseli, ku Greqia ka ushtruar presion përmes eurodeputetëve në Parlamentin Europian që regjistrimi në Shqipëri të kryhej sipas disa kushteve të vendosura prej saj.

Athina është e interesuar për regjistrimin e minoritetit. Kushtet e vendosura janë mosaplikimi i gjobave dhe penaliteteve për ata që deklarojnë një kombësi tjetër nga ajo që rezulton në Regjistrin Kombëtar të Gjendjes Civile. Një gjobë prej 1 mijë eurosh u aplikua në censin e 2011-s, me synim shmangien e rasteve kur mund të deklarohej një tjetër kombësi për përfitime financiare.

Aktualisht përllogaritet se popullsia e Shqipërisë është rreth 2.8 milionë banorë. Numri i rezidentëve, pra atyre që në 12 muajt e fundit kanë jetuar brenda vendit mund të jetë edhe më i ulët.

Të dhënat janë kontradiktore me listën e zgjedhësve që bazohet në censin e vitit 2011 dhe që është gati 3.6 milionë. Diferenca mes numrit të popullsisë në vend dhe asaj në listën e votimit shpjegohet me emigracionin.

Shqipëria dhe Bosnja janë të vetmet vende në rajon që kanë një numër votuesish më të lartë se numri i banorëve. Kosova në zgjedhjet e vitit të kaluar kishte 1.8 milionë votues dhe 1.9 milionë banorë. Në Maqedoninë e Veriut, votuesit në zgjedhjet e fundit ishin po 1.8 milionë nga dhe 2 milionë banorë.

Serbia ka 6.5 milionë votues dhe popullsinë rreth 7 milionë banorë. Mali i Zi ka 540 mijë votues dhe popullsi prej 630 mijë banorë. Në Bosnje, numri i votuesve është 3.3 mln, ndërsa banorë janë 3.2 milionë.

LEXONI GJITHASHTU: 

• INSTAT: Konsumi nuk ra, volumi u rrit në tremujorin e dytë
• Ish-shefja e INSTAT: Shifrat reale e largimit të shqiptarëve
• Regjistrimi i popullsisë në Serbi, Berisha: Vuçiç, projekt për dëbimin e shqiptarëve