Punime në autostradën Tiranë-Durrës, nga nesër devijohet qarkullimi drejt Vorës

Duke filluar nga nesër – për të paktën dy javë, – në rrugën Tiranë-Durrës do të kryhen punime për të rregulluar pjesët e dëmtuara të asfaltit. Punimet pritet të detyrojnë qarkullim me shpejtësi të reduktuar dhe përkohësisht devijimin në rrugët dytësore.

Autoriteti Rrugor Shqiptar (ARrSh) njoftoi në rrjetet sociale se, prej orës 08:00 të së mërkurës, datë 7 prill, e deri më 21 prill, do të kryejë punime për shtrimin dhe rehabilitimin e rrugës nga Qafë Kashari në hyrje të Tiranës e deri te zona e njohur si “Ura e Dajlanit” në Durrës.

Distanca e njoftuar për punime është sa gjysma e rrugës Tiranë-Durrës, konkretisht rreth 25.5 kilometra.

Punimet do të kryhen me dy faza, fillimisht në njërin kah e më pas në kahun tjetër të autostradës duke devijuar trafikun përkohësisht vetëm në një anë, në rrugët dytësore.

Katër ditët e para do të punohet në segmentin Qafë Kashar-Vorë, më pas në Vorë-Maminas, Maminas-Sukth, Maminas-Kryqëzim i Shkozetit, Shkozet-Ura e Dajlanit.

Gjatë këtyre ditëve qarkullimi drejt Vorës mund të kryhet përmes rrugës dytësore e njohur si “Rruga industriale”.

Në fazën e dytë të punimeve do të ndiqet i njëjta kronologji por me drejtimin e kundërt nga Ura e Dajlanit-Qafë Kashar.

Duke pasur parasysh ngarkesën e qarkullimit nga kjo rrugë, Autoriteti Rrugor Shqiptar bën thirrje që qytetarët të zgjedhin rrugë alternative.