Punonjësit e PTK-së në protestë për pagat e prapambetura, Balaj: Kompania drejt falimentit për faj të qeverive nga 2008

Policia e Kosovës ka refuzuar kërkesën e punëtorëve të Telekomit që të protestojnë sot para Qeverisë së Kosovës, kjo pas vendimit të fundit qeveritar që ndalon grumbullimet masive për shkak të frikës së infektimit me COVID-19.

Megjithatë, kjo nuk pritet të ndalojë punëtorët që thonë se protesta e paralajmëruar për orën 13:00 do të mbahet. Rreth 3 mijë punonjës të Telekomit nuk kanë marrë ende as pagat e muajit tetor, për shkak të bllokimit të llogarive të kësaj kompanie publike.

Kryetari i Sindikatës së Punonjësve të PTK-së në Kosovë, Lamih Balaj tha për Euronews Albania se gjithçka ka nisur të shkojë drejt kolapsit në këtë institucion që nga 2008, kur PTK e kanë marrë në dorë institucionet e Kosovës.

Sipas tij, përgjegjëse për këtë situatë janë të gjitha qeveritë kosovare, të cilat përmes keqmenaxhimit po rrezikojnë mbylljen e shërbimeve për qytetarët.

“Deri në 2008 PTK e kishin në dorë institucionet ndërkombëtare. Nga ky vit ka filluar keqmenaxhimi, që sot e kanë çuar në një ndërmarrje me minus 70 mln borxhe.

Punonjësit janë vetmit që kanë bërë publik dëmet e shkaktuara. Përgjegjëse janë të gjitha qeveritë e Kosovës nga 2008. Sepse menaxhimi është bërë nga bordet politike dhe gjithçka ka ndodhur në dijeninë e tyre. Çdo ikje nga përgjegjësia nga qeveria është dështim i vetë atyre”, tha z. Balaj.