Punonjësit e spitaleve në Kosovë në ditën e tretë të grevës, nuk tërhiqen nga kërkesat

Ka hyrë në ditën e tretë greva e 2000 punonjësve të spitaleve në Kosovë.

Sektori i sigurimit, higjienës dhe teknikës është bllokuar tërësisht, pasi këto kategori nuk janë përfshirë në skemat e bonuseve që ka dhënë qeveria në kuadër të pandemisë.

Gazetari i Euronews Albania Jeton Musliu raportoi se greva aktualisht vazhdon në të gjitha spitalet dhe qendrat e mjekësisë familjare.

“Greva vazhdon në të gjitha qendrat e mjekësisë familjare dhe spitalet rajonale. Punëtorët kërkojnë ndihmë nga qeveria për shkak se ndihen të rrezikuar në këtë kohë pandemie, dhe cilësohen si personat e parë që janë në kontakt me ambientet”, u shpreh gazetari.

Për Euronews Albania foli edhe kryetari i Sindikatës të pavarur të punëtorëve të Kosovës, Jusuf Azemi, i cili tha se punëtorët nuk do të dalin nga greva deri në plotësimin e kërkesave të tyre.

“Nëse marrin çështjen e grevës, është një grevë që nuk mbahet mend pas luftës është një organizmin që ne na mahnit. Qëndrimi i grevistëve është që greva të vazhdojë derisa nuk përmbushen kërkesat. Kur është bërë një vendim i qeverisë së Kosovës ku janë stimuluar punëtorët, mjeket dhe infermierët, ne jemi staf mbështetes, në pikën 3 dhe atje na kanë diferencuar. Parashikohej që të kishim një stimulim prej 100 euro edhe aty na kanë hequr. Nuk po bëjmë veprime politik”, u shpreh ai.  

Pas tre ditësh ndërprerje pune, premtimi i ministrit të Shëndetësisë, Armend Zemaj, për zgjidhjen e situatës, duket ende larg për t’u realizuar.

Lexoni gjithashtu:

Rreth 2 mijë punonjës të sigurimit, teknikës dhe higjienës në spitalet e Kosovës në protestë