Putin bisedon me Netanyahun për “integritetin territorial” të Sirisë

Presidenti rus, Vladimir Putin, foli për integritetin territorial të Rusisë, gjatë një bisede të zhvilluar më 28 korrik me kryeministrin izraelit, Benjamin Netanyahu.

Biseda mes dy udhëheqësve vjen pasi në jug të Sirisë pati dhunë sektare, që nxiti ndërhyrjen e Izraelit.

Izraeli kreu sulme ajrore gjatë këtij muaji në Damask dhe në provincën Suveida të banuar me minoritetin druz, duke thënë se po vepronte edhe në mbështetje të këtij minoriteti fetar, por edhe për të përforcuar kërkesat e tij për çmilitarizimin e jugut të Sirisë.

“Putin theksoi rëndësinë e mbështetjes së unitetit, sovranitetit dhe integritetit territorial” të Sirisë, tha Kremlini përmes një njoftimi.

Udhëheqësi rus shtoi se stabiliteti politik në shtet duhet të arrihet përmes respektimit “të interesave të të gjitha grupeve fetare dhe etnike”.

Ai po ashtu, gjatë bisedës me Netanyahun, ofroi që të ndërmjetësonte bisedimet për programin bërthamor të Iranit.

Rusia, një aleate e ngushtë e sundimtarit afatgjatë të Sirisë, Bashar al-Assad – i cili raportohet se ka ikur në Moskë me familjen e tij pas rrëzimit nga pushteti në dhjetor – vazhdon të ketë dy baza ushtarake në këtë shtet.

Rusia është gjithashtu afër me Iranin, me të cilin ka forcuar lidhjet ushtarake gjatë ofensivës së Kremlinit në Ukrainë.

Megjithatë, Moska përpiqet të ruajë raporte të mira edhe me Izraelin, ku jeton një komunitet i madh që kanë prejardhje ruse.