Presidenti rus Vladimir Putin priti të enjten në Kremlin homologun kinez Xi Jinping, i cili po viziton Moskën në një kohë kur lufta në Ukrainë ndodhet në vitin e katërt.

Gjatë takimit kokë më kokë, Putin ia atribuoi bashkëpunimin strategjik mes Moskës dhe Pekinit asaj që e quajti “vëllazëria luftarake” që dy vendet ndërtuan gjatë Luftës së Dytë Botërore.

“Ne po i zhvillojmë marrëdhëniet tona në të mirë të popujve të të dy vendeve dhe jo kundër dikujt tjetër. Partneriteti ynë bazohet tek barazia, përfitimi i përbashkët dhe nuk udhëhiqet nga konsiderata afatshkurtra”, tha Putin.

Presidenti rus theksoi se synimi për të formuar marrëdhënie fqinjësore, përforcimin e tyre dhe zgjerimin e bashkëpunimit është një zgjedhje e Rusisë dhe Republikës Popullore Kineze, bazuar në ndërveprimin strategjik.

Edhe pse Bashkimi Sovjetik dhe Kina ishin mes vendeve kryesore që luftuan atë që njihet si Boshti Nazist, dy vendet nuk është se luftuan krah për krah gjatë konfliktit.

Xi mbërriti në Moskë ditën e mërkurë, në prag të paradës së Ditës së Fitores, që mbahet të premten, e ku ai është i ftuari kryesor.

Gjatë qëndrimit në kryeqytetin rus, dy liderët do të diskutojnë për një sërë çështjesh, që përveç marrëdhënieve dypalëshe do të përfshijnë edhe ato me Shtetet e Bashkuara të Donald Trump, luftën në Ukrainë, e të tjera.

LEXONI GJITHASHTU:

• Lufta kundër terrorizmit, Putin dhe Modi zhvillojnë bisedë telefonike
• Refuzoi armëpushimin nga Putin, Zelensky: E dimë se me kë kemi të bëjmë