Qëndisje dhe histori, Memaj sjell ekspozitën unike me epitafin e Gllavenicës

Krejt ndryshe nga ekspozitat e tjera të paraqitura në Tiranë, artistja e re Egla Memaj, sjell një stil ndryshe, tablo me figura të krijuara në qëndisje.

Jo vetëm kaq por ajo zgjedh të risjellë në vëmendje trashëgiminë kulturore. Si subjekt ka zgjedhur epitafin e Gllavenicës një nga veprat më të rëndësishme të kohës mesjetare dhe një nga më të rrallat që gjenden në Ballkan.

Të gjitha elementet e epitafit, Egla i ka zbërthyer duke i paraqitur në tablo të ndryshme. Krishtin e vdekur, Shën Mërinë, profetët dhe engjëjt vajtues vijnë me ngjyra të ndryshme sipas gjendjes që përçojnë. 

“Në këtë ekspozitë nuk ka teknikisht lidhje me epitafin. E vetmja gjë që është marrë janë motivet, figurat dhe linja e vizatimit, pastaj e gjitha ka kaluar në zmadhim dhe krejt mënyra e bërjes është e imja,” – u shpreh Egla.

Për të treguar subjektin e epitafit, artistes i janë dashur tre vite punë.

“Në fillim ishte pak e vështirë sepse ishte një lloj eksperimenti qëndisje plus bojë, e gjitha të kthehej në kanavacë dhe proceset gjatë rrugës edhe mund të dështonin sepse ishte një e re për mua ,” – tregoi artistja.

Kjo nuk është hera e parë, që Egla vjen me një ekspozita të tilla që “ringjallin” traditën e qëndisjes.

LEXONI GJITHASHTU:

• I verbër në skenën e Operas, studenti tregon se arti nuk njeh pengesa