Qëndrimet për vendimin e Kushtetueses, BE apelon: Liderët politikë të përmbahen nga gjuha nxitëse

Shefja e zyrës së BE-së në Kosovë, Nataliya Apostolova dhe shefat e misioneve të BE-së në Kosovë, pas vendimit të Gjykatës Kushtetuese, si parim kyç i sundimit të ligjit, kanë ftuar të gjithë aktorët politikë të Kosovës që ta zbatojnë atë.

Në një deklaratë të lëshuar nga zyra e BE-së në Kosovë thuhet se tani i takon Kuvendit që t’i ndërmarrë hapat e nevojshëm kushtetues, në përputhje me vendimin e Gjykatës.

“BE u bën thirrje të gjithë liderëve politikë që të përmbahen nga gjuha nxitëse dhe ta shprehin mospajtimin e tyre ekskluzivisht në mënyrë paqësore dhe demokratike”, thuhet në deklaratë.

Ndryshe nga përfaqësuesit e tjerë të politikës që përshëndetën vendimin e Gjykatës Kushtetuese për dekretin e Thaçit, kryeministri në detyrë i Kosovës, Albin Kurti, e cilësoi vendimin e këtij organi si veprim “përtej imagjinatës në nivel politik dhe juridik”.