Qershia e Korçës ngel në pemë, mungesa e fuqisë punëtore dhe çmimi i ulët rrezikojnë fermerët

Që prej hapjes së pjesshme të pikës kufitare të Kapshticës për punonjësit sezonalë, mbi 8000 persona kanë shkuar në vendin fqinj për të punuar. Ndërkohë, fshati Dvoran i Korçës, i njohur për kultivimin e qershisë vuan për punëtorë për vjeljen e tyre.

Fermerët shprehen se qershia ende nuk është duke dhënë fitimet që ata prisnin.

“Kemi më tepër se dy javë që mbledhim qershi. Dora e parë është në përfundim. Ditët e fundit falimentoi fare. Çmimi shumë i ulët, punëtorë mezi gjenim. Shumica e fermerëve kanë vuajtur, nuk kanë fuqi punëtore. Kanë emigruar të gjithë të rinjtë jashtë shtetit, disa që vijnë kërkojnë çmim shumë të lartë, s’ke leverdi për aq sa kërkojnë ata”, – thotë Alma Zhabollari, fermere.

“Mbledhje e qershisë deri tani ka vazhduar mirë, pavarësisht se dora e parë nuk ishte aq e mirë me çmimin. Ra edhe shi ditët e fundit. Punëtorë kanë pasur probleme se të rinjtë nuk para vijnë, janë dembelë. Duan të pinë kafe, e vijnë të huajt që kërkojnë 15 për ditën e punës. Nuk ka leverdi”, – shprehet Ilir Jahja, fermer.

Puna sezonale mbetet një nga të ardhurat kryesore për shumë shqiptarë, ndërkohë që kërkesa e fqinjëve grekë ka zbrazur tregun vendas. Në Greqi një person fiton afërisht 30 euro në ditë, ndërkohë në Dvoran një punëtor paguhet 1200-1500 lekë të reja.

“Sezoni i vjeljes së qershive është tejet i shkurtër, ndaj edhe fermerët këtu në fshatin Dvoran të Bashkisë së Korçës duket se rrezikojnë t’i lënë qershitë e tyre në pemëtore. Sipas këtyre të fundit, të rinjtë e fshatit kanë shkuar për punë sezonale në Greqi, ndërkohë që të tjerët nuk duan të vijnë për të punuar.

LEXONI GJITHASHTU:

• Bimët medicinale pa krah pune, vështirësi në grumbullim, rrezikohen miliona dollarë të ardhura
• Kasmi: Keqmenaxhimi i punëtorëve gjatë pandemisë dhe mungesa e kualifikimit ka lënë pa staf turizmin në Shqipëri