Qeveri e pakicës në Bullgari, tërhiqet nga koalicioni partia populiste

Kryeministri i Bullgarisë Kiril Petkov shprehet i vendosur se do të vijojë përpara me një qeveri të pakicës, pasi humbi shumicën parlamentare.

Tre ministra nga partia populiste ‘Ka një popull të tillë’, duke përfshirë ministren e Jashtme u tërhoqën nga koalicioni qeverisës.

Kreu i kësaj partie  Slavi Trifonov ka akuzuar udhëheqësin bullgar se po e çon vendin drejt falimentimit duke krijuar  borxhe të reja.

Trifonov pohoi se kryeministri kishte injoruar interesat kombëtare të Bullgarisë duke bërë lëshime ndaj Maqedonisë së Veriut fqinje.

Nga nëntori 2020 Sofja ka bllokuar hapjen e negociatave të pranimit në BE të Shkupit për shkak të mosmarrëveshjeve historike mbi gjuhën.

“Po i tërheq ministrat tanë për t’i dhënë fund këtij koalicioni, kësaj agonie”, shkroi ish-këngëtari në Facebook.

Tërheqja e njërës prej katër partive të koalicionit kërcënon  të destabilizoi qeverinë e qendrës.

Koalicioni qeverisës me katër parti ka  134 vende në Asamblenë Kombëtare nga 240 vende në total , por pa mbështetjen e 25 ligjvënësve të partisë ‘Ka një popull të Tillë’ , do të mbetej pa një shumicë.

Petkov tha se ishte “optimist” se partia e tij  dhe dy partnerët të mbetur të koalicionit mund të qeverisin ende.

Por analistët shprehin shqetësimin  se tërheqja e partisë së Trifonof  mund ta zhysë kombin më të varfër të BE-së në një krizë të re politike mes normave të larta të inflacionit për shkak të luftës në Ukrainë.

Petkov u emërua  kryeministër i Bullgarisë pasi tre zgjedhje parlamentare në 2021 që nuk arritën të emëronin një qeveri. 42-vjeçari është zotuar të reformojë shtetin anëtar të BE-së dhe përsëriti objektivin e tij për “tolerancë zero për korrupsionin”.

LEXONI GJITHASHTU:

• Bullgaria përjashtohet nga embargoja ruse e naftës deri në fund të 2024