Qeveria e Kosovës kundër tërheqjes së mjeteve nga Trusti

Qeveria e Kosovës është shprehur kundër tërheqjes së mjeteve nga Fondi i Kursimeve Pensionale i njohur si Trusti.

Kryeministri Albin Kurti, tha se nëse Kuvendi voton për tërheqje të fondeve, do të ishte rrënim i kursimeve të qytetarëve.

Opozita në Kosovë kërkon që qytetarëve t’u mundësohet tërheqja deri në 30 për qind e parave të kursimeve të tyre pensionale.

Sipas propozimit të Partisë Demokratike të Kosovës, kontribut paguesit që kanë më pak se 10 mijë euro kursime pensionale të kenë të drejtën e tërheqjes së 30 për qind të mjeteve.

Edhe presidentja e Kosovës Vjosa Osmani ka komentuar këtë propozim.

Sipas saj i takon Kuvendit të që të marrë vendime që mbrojnë interesin e qytetarëve.

Presidentja e Kosovës, Vjosa Osmani tha: “Ky siç e dini është vendim i Kuvendit të Kosovës. Presidenca e Republikës nuk e merr atë vendim. Ajo ç’ka dua t’i inkurajoj deputetët e Kuvendit të Kosovës është që të marrin një vendim që mbron interesin afatgjatë të qytetarëve të Republikës sonë. Deputeti duhet të ndihet i lirë për të marrë vendimin në interes të popullit, prandaj të kontribuojmë të gjithë bashkërisht në këtë drejtim që deputeti të ndihet i lirë pavarësisht se cilës parti i takon dhe ta ketë për bazë edhe ekspertizën që jepen nga institucionet vendore dhe ndërkombëtare”.

Fondi Monetar Ndërkombëtar është shprehur kundër një tërheqje tjetër të mjeteve të Trustit.

Një tërheqje e ngjashme deri në 10 për qind është bërë në vitin 2020, pas përkeqësimit të gjendjes financiare të familjeve, për shkak të pandemisë së shkaktuar nga koronavirusi.

LEXONI GJITHASHTU:

• Kurti mohon të ketë një plan për asociacionin e komunave me shumicë serbe