Racizmi në Formula 1, Hamilton: T’i hapim rrugë diversitetit

Lewis Hamilton deklaroi se Formula 1 duhet t’i injorojë ato që i ka quajtur “zërat e vjetër” dhe të mos pranojë racizmin, në një kohë kur po bëhet gjithnjë e më gjithëpërfshirëse.

Hamilton, i vetmi pilot me ngjyrë i F1, reagoi ndaj komenteve të bëra nga ish-kampioni Nelson Piquet, që iu referua pilotit britanik me terma racistë.

“Jam përballur shpesh herë me racizëm dhe kritika dhe madje në mënyrë negative e arkatike për shumë kohë, shoqëruar me tone diskriminuese. Ndaj këtu nuk ka asgjë të re për mua. Mendoj se tabloja është shumë më e gjerë. Nuk e kuptoj përse vazhdojmë t’u kushtojmë vëmendje zërave të vjetër në një kohë kur po përpiqemi të bëjmë diçka ndryshe. Kjo nuk ka të bëjë me mua, por me atë që jemi si sport dhe ku dëshirojmë të arrijmë”, tha piloti i ‘Mercedes’.

Hamilton tha se dëshiron që Formula 1 të zgjerojë diversitetin dhe të bëhet më gjithëpërfshirëse.

“Nëse duam të rritemi si sport në Shtetet e Bashkuara apo vende të tjera, si Afrika e Jugut dhe të rrisim audiencën, atëherë duhet të shohim drejt së ardhmes, duke iu dhënë të rinjve një platformë më përfaqësuese të asaj që po përpiqemi të bëjmë dhe për drejtimin që duam të marrim”, u shpreh Hamilton.

Hamilton po punon me ekipin e ‘Mercedes’ për të financuar një sërë projektesh, me qëllim promovimin e pjesëmarrjes së femrave në F1 dhe garantimin e bursave për studentët me ngjyrë në fushën e automobilizmit.

LEXONI GJITHASHTU:

• Forumi për holokaustin, liderë nga e gjithë bota diskutojnë mbi luftën ndaj racizmit
• Racizmi në futboll, UEFA dënon me 10 ndeshje mbrojtësin e Slavia Pragës