Rakacolli: Nëse shifrat e COVID-19 do mbeten të qëndrueshme mund të hapemi totalisht

Zv. Ministrja e Shëndetësisë, Mira Rakacolli thotë se zgjatja e orarit për lejimin e muzikës nuk lidhet me protestën e bizneseve në Vlorë.

Zyrtarja tha se indikatorët e përhapjes së COVID-19 vlerësohen çdo një javë apo dy javë ndërsa masat e fundit kanë hyrë në fuqi më 1 korrik.

“Nuk do ta lidhja aspak me situatën e krijuar në Vlorë pasi ne e monitorojmë dhe vlerësojmë situatën epidemiologjike vazhdimisht”, tha znj. Rakacolli.

Nga ana tjetër zv.ministrja tha se rastet në krahasim me 1 korrikun kanë ardhur duke u shtuar por pavarësisht kësaj masat janë lehtësuar më tej.

“Kemi një numër rastesh lehtësisht të rritur në krahasim me periudhën para 1 korrikut por është brenda shifrave të kontrollueshme dhe që është shumë më pak nga ç’pritej nga lehtësimi i masave dhe turizmi që ka aktivitet të shtuar”, deklaroi zv.ministrja.

Znj. Rakacolli shtoi se “u mendua që të kalohej në një lehtësim të masave duke vlerësuar se nuk do të ndikojë në rritjen e rasteve”.

Edhe pse vendi ynë është në pragun e ekzistencës së variantit “Delta”, zv.ministrja tha se mund të shkohet drejt hapjes totale nëse situata mbetet e qëndrueshme.

“Nëse do të ketë shifra të qëndrueshme do të shkojmë drejt hapjes totale por në se do të ketë shtim të rasteve do të shkojmë dhe drejt masave shtrëngese”, përfundoi znj. Rakacolli.

LEXONI GJITHASHTU:

• Asnjë humbje jete nga COVID-19 që prej 26 qershorit
• Lokalet mbyllur për protestë, Rama thekson se muzika do vijojë të ndalohet në mbrëmje
• Kryeministri Rama thirrje qytetarëve të ruhen nga varianti Delta i COVID-19