Raketa dhe sanksione ndaj Rusisë, zbardhen detaje nga vizita e Zelenskyt në Londër

Presidenti i Ukrainës, Volodymyr Zelenskyy, i ka kërkuar Shteteve të Bashkuara që të zgjerojnë sanksionet kundër industrisë ruse të naftës dhe të ofrojnë mbështetje ushtarake shtesë, përfshirë raketa me rreze të gjatë veprimi, për t’u përballur me agresionin e vazhdueshëm rus.

Zelenskyy ndodhej në Londër të premten, ku mori pjesë në një takim me dhjetëra udhëheqës evropianë që kanë premtuar mbështetje të mëtejshme për Kievin, në rast se arrihet një armëpushim që mund të ngrijë luftën tashmë mbi trevjeçare.

Takimi, i organizuar nga kryeministri britanik Keir Starmer, kishte për qëllim forcimin e presionit ndërkombëtar ndaj presidentit rus Vladimir Putin. Ai u zhvillua në një kohë kur Bashkimi Evropian dhe Shtetet e Bashkuara kanë njoftuar një raund të ri sanksionesh që synojnë të ardhurat kryesore të Rusisë nga eksportet e naftës dhe gazit.

Gjatë diskutimeve, u trajtuan gjithashtu masat për të mbrojtur rrjetin energjetik të Ukrainës nga sulmet e vazhdueshme me dronë dhe raketa, ndërsa vendi po përgatitet për dimrin e afërt. Prioritet mbetet forcimi i mbrojtjes ajrore dhe furnizimi i ushtrisë ukrainase me raketa me rreze të gjatë veprimi që mund të godasin objektiva brenda territorit rus.

Zelenskyy i kërkoi Uashingtonit të dërgojë raketa Tomahawk, një kërkesë që, sipas tij, do të përmirësonte ndjeshëm aftësitë mbrojtëse të Ukrainës. Ai vlerësoi gjithashtu vendimin e presidentit amerikan Donald Trump për vendosjen e sanksioneve të reja ndaj sektorit të naftës ruse, duke e quajtur “një hap të madh”.

“Duhet të ushtrojmë presion jo vetëm ndaj Rosneft dhe Lukoil, por ndaj të gjitha kompanive ruse të naftës,” deklaroi Zelenskyy gjatë një konference për shtyp në Ministrinë e Jashtme britanike.

“Përveç kësaj, po zhvillojmë një fushatë presioni me dronë dhe raketa që synojnë posaçërisht sektorin rus të naftës,” shtoi ai.

Sipas zyrtarëve britanikë, samiti synon të ruajë unitetin e aleatëve perëndimorë përballë sfidave të reja të sigurisë dhe të sigurojë mbështetje afatgjatë për Ukrainën.