Rama: Unë nuk kam vetëm plan B për BE, për çdo gjë tjetër jam te C-ja

Kryeministri Edi Rama, gjatë fjalimit të tij në mbledhjen për çështjen Balluku, pasi grupi parlamentar i PS rrëzoi kërkesën e SPAK për heqjen e imunitetit dhe arrestimin e Belinda Ballukut, foli mbi punët dhe projektet që ka realizuar Balluku gjatë ushtrimit të detyrës së saj si ministre e Infrastrukturës dhe Energjisë.

Gjatë fjalës së tij, Kryeministri Rama paralajmëroi ata që nuk po lënë gur pa lëvizur për të penguar projektin e Porto Romanos. Ai u shpreh se i kanë bërë llogaritë gabim dhe se projekti do të realizohet. Rama theksoi se nuk ka vetëm plan B për BE-në, ndërsa për çdo gjë tjetër është te C-ja.

“Një proces shumë i intensifikuar po ndodh me projektin e studios më të madhe në botë dhe me reputacionin më absolut për ndërtimin e infrastrukturës portuale, Royal Haskoning nga Holanda. Një garë e jashtëzakonshme me pjesëmarrje nga të gjitha anët, e monitoruar nga A-ja tek Zh-ja nga konsulenti Royal Haskoning, dhe armiqësi ndaj projektit. Nuk dua të flas më shumë, por një gjë do ta them këtu.

Ata që e luftojnë projektin, ata që nuk lënë gur pa lëvizur për ta bllokuar, ne e dimë kush janë, dhe i kanë bërë llogaritë gabim, sepse projekti do të bëhet. Unë nuk kam vetëm plan B për BE-në. Për çdo gjë tjetër jam te C-ja”, u shpreh Rama.