Raporti i Eurostat: 15% e fuqisë punëtore në BE nuk përballuan dot pushimet në 2023

Sipas të dhënave të Eurostat për vitin 2023, rreth 42 milionë punëtorë në Bashkimin Europian nuk kanë mundësi të përballojnë një javë pushim larg shtëpisë.

Ky numër përfaqëson rreth 15% të fuqisë punëtore në BE, një rritje prej 1% krahasuar me vitin 2022.

Katër ekonomitë më të mëdha të BE-së — Italia, Gjermania, Spanja dhe Franca — kanë secila mbi 5 milionë punëtorë që nuk mund të përballojnë pushime njëjavore jashtë shtëpisë.

Italia kryeson me 6.2 milionë të tillë, pasuar nga Gjermania me 5.8 milionë, Spanja me 5.6 milionë dhe Franca me 5.1 milionë.

Në nivel vendesh, Rumania ka përqindjen më të lartë të punëtorëve që nuk mund të përballojnë pushime, me 32%, ndjekur nga Hungaria (26%), Bullgaria (24%), Portugalia dhe Qipro (23%) dhe Sllovakia (22%).

Në kontrast, vendet nordike si Finlanda, Suedia dhe Danimarka, së bashku me Holandën, Luksemburgun dhe Slloveninë, kanë nivelet më të ulëta të varfërisë së pushimeve, me vetëm 5-7% të punonjësve që nuk përballojnë pushimet.

Raporti i Eurostat thekson një pabarazi të theksuar në përballueshmërinë e pushimeve mes vendeve të Europës Lindore dhe Jugore krahasuar me ato të Europës Perëndimore dhe Veriore.