Raporti i OKB-së për drogën, Shqipëria e para në Europë për kanabisin

Në raportin e fundit të zyrës globale të Kombeve të Bashkuara për krimin dhe drogat, Shqipëria përmendet në shtetet kryesore të origjinës së kanabisit në Europë dhe e gjashta në botë për vitet 2015-2019.

Në raport citohet Shqipëria, pas Marokut, Afganistanit, Pakistanit, Libanit, Iranit, ndërsa në Europë, Shqipëria është e para, duke ia kaluar dhe Spanjës e Holandës.

Në vitet e fundit, citohet në raport, është vënë re një diversifikim i aktorëve kriminalë të përfshirë në menaxhimin e zinxhirit të furnizimit me kokainë midis Amerikës së Jugut dhe Europës.

Në të kaluarën, kjo tregti e paligjshme ishte e dominuar nga një numër i vogël aktorësh dhe kanalesh të vendosura mirë, kryesisht grupet italiane të krimit të organizuar dhe aleancat midis grupeve kolumbiane dhe spanjolle.

Për shumë vite, Holanda ka qenë një post i rëndësishëm në skenë për disa organizata kriminale. Sidoqoftë, në vitet e fundit, një numër grupesh të tjera europiane janë shfaqur si aktorë kryesorë në orkestrimin e dërgesave të sasive të konsiderueshme të kokainës në Europë, gjithashtu duke vendosur praninë dhe kontaktet e tyre në Amerikën Latine.

Disa nga rrjetet emergjente, nënvizon raporti, në veçanti rrjetet shqiptare, janë gjithashtu të përfshirë në shpërndarjen e kokainës në të gjithë Europën dhe brenda disa vendeve evropiane, duke u mundësuar atyre që të zbatojnë një model biznesi “nga fundi në fund”.

Grupet e përbëra nga serbo-kroatë, kryesisht shtetas të Bosnje dhe Herzegovinës, Kroacisë, Malit të Zi dhe Serbisë, janë bërë gjithashtu lojtarët kryesorë në prokurimin e sasive të mëdha të kokainës dhe organizimin e transportit dhe shitjes tek blerësit europianë.

LEXONI GJITHASHTU: 

• Mbi 30 mijë rrënjë kanabis u zbuluan gjatë operacionit policor në Fushë-Krujë, 16 të arrestuar, 24 në kërkim
• Vijon operacioni anti-kanabis në zonën e Krujës, policia kontrolle në terren
• Shpërndanin kanabis në kryeqytet, arrestohen 12 persona, në kërkim 6 të tjerë