Raporti: Sulmet izraelite në Gaza vrasin mbi 16,500 fëmijë që në nisje të ofensivës

Më shumë se 16,500 fëmijë dhe adoleshentë palestinezë janë vrarë që nga fillimi i ofensivës izraelite në Rripin e Gazës në tetor 2023, njoftoi të enjten Ministria e Shëndetësisë në Gaza. Këto shifra përfshijnë viktimat nga bombardimet dhe pasojat e krizës humanitare në enklavën e rrethuar.

Sipas të dhënave zyrtare, kanë humbur jetën si pasojë e konfliktit

• 916 foshnje nën një vjeç

• 4,365 fëmijë nga një deri në pesë vjeç

• 6,101 fëmijë nga gjashtë deri në 12 vjeç

• 5,124 adoleshentë nën 17 vjeç

Ministria deklaroi se këto nuk janë “shifra të thata”, por tregues të përmasave të një katastrofe të thellë humanitare. “Bëhet fjalë për një brez që duhej të mbrohej, por që është bërë viktimë e një fushate të pamëshirshme bombardimesh,” thuhet në deklaratë.

Autoritetet shëndetësore i bënë thirrje bashkësisë ndërkombëtare dhe organizatave humanitare që të marrin përgjegjësi ligjore dhe morale për situatën në Gaza, të ndërmarrin veprime të menjëhershme për t’i dhënë fund luftës dhe të kërkojnë përgjegjësi për krimet ndaj civilëve.

Operacioni ushtarak izraelit, i nisur në tetor pas sulmit të Hamasit më 7 tetor 2023, ka çuar në një krizë të paprecedentë humanitare në Gaza, me qindra mijëra të zhvendosur dhe një sistem shëndetësor në kolaps.