Raportime për luftime teksa hyn në fuqi armëpushim i vendosur nga Rusia

Armëpushimi i shpallur nga Kremlini në Ukrainë, për Krishtlindjen Ortodokse, hyri në fuqi më 6 janar, por është e paqartë nëse ndonjëra palë do t’i përmbahet, pasi Kievi dhe disa qeveri perëndimore – përfshirë Qeverinë amerikane – e quajtën armëpushimin si pretekst të Rusisë për t’u rigrupuar, pas ngecjeve që ka pësuar në fushëbetejë gjatë javëve të fundit.

Televizioni rus tha se armëpushimi hyri në fuqi në mesditë, me kohën lokale të Moskës, dhe do të zbatohet “përgjatë gjithë vijës së kontaktit” në Ukrainë.

Por, zyrtarët ukrainas në Kramatorsk raportuan për bombardime dhe agjencia shtetërore e lajmeve ruse, TASS, tha se forcat ruse kanë granatuar Donjeckun “pikërisht në mesditë”.

Ndërkaq, Ukrinform raportoi se pothuajse një orë pas nisjes së armëpushimit janë lëshuar në mbarë vendin sirenat paralajmëruese për sulme ajrore.

Asnjë nga këto raportime nuk ka mundur të verifikohet në mënyrë të pavarur.

Presidenti rus, Vladimir Putin, shpalli armëpushimin dhe tha se do të hyjë në fuqi në orën 09:00 të 6 janarit, sipas kohës lokale, dhe do të jetë në fuqi deri në mesnatën e 7 janarit. Por, homologu i tij ukrainas, Volodymyr Zelensky, hodhi poshtë këto thirrje, duke thënë se Rusia do ta përdorte këtë kohë për të përmirësuar pozicionin e saj në fushëbetejë.

LEXONI GJITHASHTU: 

• Kush është Ovido Guzman, djali i famëkeqit “El Chapo”. Pse e quajnë “El Raton”
• SHBA miraton vaksinën e parë në botë për bletët
• “Berisha i mundi pa vulë”- Meta pyetet për largimin e Agron Çelës