PD akuza PS për Kodin Zgjedhor: Shkele marrëveshjen që u investuan SHBA e BE

Përfaqësuesi i Partisë Demokratike në Këshillin Politik, Oerd Bylykbashi i është përgjigjur reagimit të Damian Gjiknurit, i cili tha se opozita jashtëparlamentare po synon të zvarrisë procesin e ndryshimeve kushtetuese në Kodin e ri Zgjedhor. 

Me një shënim në faqen zyrtare në “Facebook”, z. Bylykbashi thekson se modelet demokratike për zgjedhjen e koalicioneve parazgjedhore ekzistojnë, ndërsa me ironi shton faktin se opozita nuk mund të propozojë dot modele, që shpëtojnë kryeministrin nga humbja e  25 prillit.

“Modelet demokratike ekzistojnë, por model qe te shpëtoje Edi Ramën nga humbja ne nuk gjejmë dot. Këtë kërkon Edi Rama nga Këshilli Politik dhe për këtë ai është gati të sakrifikojë Shqipërinë”, shkrua  Bylikbashi.

Teksa komenton edhe njëherë modelin e koalicioneve në shtetin fqinj të Italisë, përfaqësuesi i selisë blu në Këshillin Politik nënvizon se opozita ka propozuar modele, por sipas tij, vetë Partia Socialiste nuk ka pasur vullnet dhe as dëshirë për t’i pranuar ato.

Madje ai shkon më tej, kur thotë se PS-ja shkeli marrëveshjen në të cilën u investuan vetë Shtetet e Bashkuara të Amerikës dhe Bashkimi Europian.

“Modelet t’i kemi thënë që ditën e parë, por kur ti shkelje një marrëveshje për të cilën u investua nga Sekretari i Shtetit i SHBA  tek drejtuesit më të lartë të BE, këto as i sheh as i dëgjon. Këto justifikimet janë njësoj si hapja fallso e listave”, shton Bylykbashi.

Kryeministri i vendit, Edi Rama, njoftoi se në seancën e nesërme pritet të miratohen nenet në Kodin Zgjedhor, por kjo lëvizje për opozitën bie ndesh me rekomandimet e OSBE-ODIHR. 

Lexoni gjithashtu: 

Gjiknuri i përgjigjet opozitës për modelin italian të koalicioneve: S’ka lidhje me atë të Shqipërisë

Rama paralajmëroi votimin e Kodit Zgjedhor, Bylykbashi: Asnjë truk s’do ta ndalë fitoren e opozitës

PS miraton e vetme ndryshimet në Kodin Zgjedhor, ulet pragu dhe ndryshon formula e listave