Reciprociteti me Serbinë, kundërshtarët “kryqëzojnë” Kurtin për deklaratat

Paralajmërimet e qeverisë Kurti për rikthimin e reciprocitetit ndaj Serbisë, kanë ngjallur dyshimet e opozitës. Për Partinë Demokratike të Kosovës dhe Aleancën për Ardhmërinë e Kosovës, këto deklarata janë thjesht manipulative.

Ndërkohë që Bashkimi Evropian po kërkon nga institucionet e Kosovës të përmbahen nga veprimet që janë të dëmshme për normalizimin e marrëdhënieve ndërmjet Kosovës dhe Serbisë, për anëtarin kryesisë së PDK-së, Betim Gjoshi, Kurti po vepron me dy standarde

 “Nuk e ka ndërmend z. Kurti ta vendosë reciprocitetin, as nuk do ta bëjë asnjëherë. Vetëm e ka përdorur sa për t’i marrë votat e njerëzve, qysh e ka përdorur të gjithë fushatën zgjedhore të tij këto vite për të manipuluar me ndjenjën e njerëzve. Por asnjëherë nuk e ka pas sinqerisht asnjë veprim. Dallon Albin Kurti i opozitës me atë të qeverisë”, deklaron Gjoshi.

Kritik ndaj Kurtit për këtë temë është edhe shefi i grupit parlamentar të AAK-së, Besnik Tahiri, i cili i ka cilësuar si populiste deklaratat e Kurtit.

“Sa i përket eksperimenteve me reciprocitet dhe veprime të tjera populiste këtë nuk e kemi në diskutim, e dimë që nuk do ta bëjë nuk do ta vendos, por janë vetëm tema të diskutimit që lidhen me konsum të brendshëm, me konsum elektoral dhe jo me veprime qeveritare”, thotë ai.