‘Reciprociteti për targat’ mund të shkundë politikën mes Kosovës dhe Serbisë, thotë gazetari

Gazetari Franko Egro është i mendimit se nisma për “reciprocitetin e targave” ndërmarrë nga Albin Kurti në Kosovë mund t’i japë tjetër dimension dialogut me Serbinë.

Në një diskutim në Euronews Albania, Egro tha se nuk ishte i befasuar nga vendimi i Kurtit për të vendosur detyrimin e targave të përkohshme për automjetet serbe që kalojnë në Kosovë. Ai tha se kjo gjë pritej duke pasur parasysh deklaratat e tij të mëparshme.

“Jemi në një moment që Kryeministrit Kurti po bën në kuadër të qasjes së tij të re dhe të ndryshme nga pasardhësit e tij po bën në dialogun Kosovë-Serbi,” – vuri në dukje gazetari Egro.

Sipas Egros kjo lëvizje e Kurtit pritet ta shkundë situatën politike mes Kosovës dhe Serbisë për sa i përket dialogut ku Prishtina kërkon që të futet në bisedime me pozita të barabarta.

Egro nuk e anashkaloi faktin se kjo lëvizje të jetë bërë për efekt politik pasi Kosova ka përpara zgjedhjet lokale. Përkundrazi ai e justifikoi duke thënë se si parti politike është e pritshme që të shfrytëzohen të gjitha aspektet e mundshme.

Gjatë analizës së tij, gazetari Egro e konsideroi me “qasje të mefshtë” drejtimin e BE-së për procesin e dialogut mes Kosovës dhe Serbisë.

LEXONI GJITHASHTU:

• Çfarë është ‘reciprociteti për targat’ aplikuar sot nga Kosova?
• Albin Kurti: Targat s’janë dëshirë e jona, por imponim nga pala tjetër
• Lista Serbe në Kosovë e shqetësuar për targat: Kërcënim i drejtpërdrejtë, Vuçiç të reagojë
• BE thirrje Kosovës e Serbisë të ulin tensionet