“Referendum për statusin e Kosovës”, këshilltari politik i Vetëvendosjes e cilëson absurde deklaratën e presidentit Vuçiç

Arbër Zaimi, këshilltari politik i Vetëvendosjes tha për Euronews Albania se deklarata e presidentit serb, Aleksandër Vuçiç, se çështja e statusit të Kosovës mund të vendoset me referendum, është e papranueshme dhe absurde.

Z. Zaimi theksoi se Kosova e ka statusin e një vendi të pavarur, e pranuar nga 117 shtete dhe është absurde të mendohet se populli serb do të vendosë me referendum për një fakt të tillë.

“Me sa kam lexuar, Vuçiç ka thënë që çështja e statusit të Kosovës do të vendoset me referendum nga populli i Serbisë, është një deklaratë e papranueshme dhe absurde. Kosova është shtet i pavarur, statusi i saj nuk vendoset nga askush”, tha z. Zaimi.

I pyetur lidhur me qëndrimin e z. Kurti sa i përket dialogut me Serbinë, z. Zaimi tha se Vetëvendosja ka qenë kundër negociatave për statusin e Kosovës, që siç theksoi është i panegociueshëm.

Sipas tij, z. Kurti e ka bërë të qartë se negociatat janë mbi statusin e marrëdhënieve Kosovë-Serbi, jo mbi pavarësinë e Kosovës.

“Me Vuçiç nuk kemi pasur takime, kemi pasur takim në Bruksel me ndërmjetësinë e BE. Qëndrimet e Kurtit në këto takime janë transparente dhe publike”, u shpreh z. Zaimi.

Sipas këshilltarit politik të Vetëvendosjes, 100 ditët e para të qeverisë Kurti kanë qenë intensive dhe me arritje të rëndësishme në fushën e shëndetësisë, drejtësisë dhe rendit.

LEXONI GJITHASHTU:

• Vuçiç: Serbia e gatshme për kompromis me Prishtinën, por vendosin njerëzit
• Shaip Kamberi debaton me Aleksandër Vuçiçin për dialogun Kosovë-Serbi