Reforma ushtarake në Gjermani, dështon plani i partive të koalicionit qeverisës

Partnerët e koalicionit në Gjermani kanë dështuar të bien dakord mbi reformën në forcat e armatosura.

Negociatorët e partisë Unioni Kristian Demokrat, i udhëhequr nga kancelari Friedrich Merz dhe ata të partisë Social-Demokrate më parë e kishin mbështetur propozimin për të futur një sistem lotarie, që do të përdorej në rast se nuk do të kishte mjaftueshëm vullnetarë të regjistruar.

Mediat gjermane sugjerojnë se politikanët Social-Demokratë nuk ishin të kënaqur me idenë në fjalë, duke çuar në dështimin e saj.

Deri të martën mbrëma dukej se partnerët e koalicionit ishin dakord, me kryetarin e grupit parlamentar të unionit CDU/CSU, Jens Spahn që tha se “një zgjidhje e mirë ishte gjetur”.

Por përplasja e papritur vë në dukje brishtësinë e koalicionit të Merz dhe tregon se sa përçarëse është çështja e shërbimit ushtarak në Gjermani.

Situata ka bërë që të jetë e paqartë nëse shërbimi ushtarak do të diskutohet ditën e enjte në Bundestag.

Pas përplasjes, politikani i CDU-së, Norbert Röttgen deklaroi për mediat gjermane se faji ishte i ministrit të Mbrojtjes, Boris Pistorius, nga radhët e SPD-së.

Nga ana e tij, Pistorius nuk e fshehu zemërimin kur braktisi mbledhjen e grupit parlamentar të partisë mbrëmjen e së martës. “Ideja nuk ishte e imja, por e CDU-së”, tha Pistorius, duke iu referuar sistemit të lotarisë.

LEXONI GJITHASHTU:

• Shefi i inteligjencës gjermane: Rusia mund të përfshihet në konfrontim ushtarak
• Pse Gjermania e anuloi programin e përshpejtuar të shtetësisë?