Rekord negativ në Kosovë, Hoti thërret ekspertët për të ashpërsuar masat ndaj COVID-19

Kosova regjistroi dje numrin më të lartë të viktimave në një dite nga koronavirus. 8 persona humben jetën të shtunën ndërsa rastet e reja shënuan rekordin prej 178 personash pozitivë.

Situata serioze që ka shkaktuar përhapja e Covid-19 ka detyruar kryeministrin Avdullah Hoti të thërrasë në një takim krerët e institucioneve shëndetësore për të diskutuar mbi masat që duhen ndërmarrë për të parandaluar përhapjen e mëtejshme të virusit.

Me rekordin e ditës së djeshme numri i viktimave në Kosove ka shkuar në 66, ndërsa raste aktive janë 1416. Prishtina mbetet komuna me numrin më të lartë të viktimave dhe të personave të infektuar.

Ministria e Shëndetësisë dhe Instituti Kombëtar i Shëndetit kanë bërë apel qytetarëve të mbajnë maskat duke e konsideruar të detyrueshme këtë masë. Ndërsa bizneseve u kërkohet që t’u përmbahen protokolleve.

Edhe Maqedonia e Veriut shënoi dje një numër të lartë viktimash dhe rastesh të reja. 6 persona humben jetën ndërsa u regjistruan 147 raste pozitive. Shifrat rëndojnë me tej bilancin ne shtetin fqinj, duke e çuar ne 334 numrin e te vdekurve dhe mbi 3 mije e 600 te rasteve aktive me covid-19.

Ndërkaq në Shqipëri, dje u vu re një rënie e lehtë e rasteve pozitive, pasi u shënuan 67 të tilla, ndërsa nga pandemia deri tani kanë humbur jetën 74 persona.