Rëndohet situata e pandemisë, mjeku Llajo: Përhapja e COVID-19 nuk varet nga mosha apo sëmundjet e bashkangjitura

Situata e pandemisë në gjithë vendet e Europës është e rënduar. Numri i rasteve të reja është në rritje dhe shtetet janë duke marrë gjithnjë e më tepër masa kufizuese për parandalimin e përhapjes së saj.

Mjeku Vasil Llajo në një lidhje të drejtpërdrejtë nga Athina tha për Euronews Albania se ajo që është shqetësuese në Greqi nuk është vetëm numri në rritje i rasteve me COVID-19, por numri i të shtruarve në spitale.

“Numri i të intubuarve ka arritur në 187 dhe ajo që bie në sy është se dy të tretat e tyre janë të moshës 45-55 vjeç. Numri total i rasteve është 2917 nga të cilët vetëm një e treta janë mbi 65 vjeç dhe dy të tretat janë nën këtë moshë,” – sqaroi mjeku Llajo.

Ai theksoi se ka humbur tashmë korrelacioni i moshës dhe sëmundjeve dytësore me shtimin e numrit të rasteve.

Arsyeja se përse qeveria greke u detyrua t’i kthehet izolimit është sepse shtrirja e coronavirusit po bëhej pa dallim moshe apo sëmundjesh të bashkangjitura.

Vasil Llajo shprehu mendimin se edhe Shqipëria duhet të marrë masat e nevojshme për parandalimin e përhapjes së pandemisë.

Lexoni gjithashtu: 

Kufizime nga COVID-19: Protesta në Londër kundër masave izoluese, Greqia për tre javë në bllokim total

Shtatë të vdekur dhe numër rekord rastesh të reja pozitive me COVID-19

Të tjera masa kufizuese, Greqia vendos izolimin total