Rënie historike e konsumit, pasiguritë dhe frika nga pandemia kufizuan blerjet në popullatë

Konsumi i popullatës ka shënuar rënie gjatë vitit që lamë pas, për herë të parë që nga viti 1990.

Pandemia e COVID-19 u shoqërua me një krizë, e cila ndryshoi mënyrën e sjelljes së konsumatorëve, të cilët kufizuan blerjet në disa kategori mallrash, si barna e ushqime.

Sipas të dhënave të INSTAT, konsumi final i popullatës shënoi rënie me 2.34%, dhe kjo lidhet ngushtë me humbjen e vendeve të punës dhe pasiguritë për të ardhmen.

Sipas INSTAT, ekonomia shqiptare ka pësuar një recesion në nivelin 3.31% gjatë vitit 2020, vit i cili u shoqërua nga pasojat e tërmetit dhe pandemia COVID-19.

Pavarësisht pritshmërive, tkurrja e ekonomisë rezulton në nivele më të ulëta, sesa ajo që parashikonin institucionet financiare ndërkombëtare, që llogarisnin recesion nga -6% deri në -9%.

Ndikim në këtë nivel sipas INSTAT ka dhënë tremujori i fundit, i cili rezultoi me rritje prej 2.99%. Sektorët më kontribut pozitiv ishin ndërtimi, i nxitur nga procesi i rindërtimit, por edhe shëndetësia e cila njohu rritje të ndjeshme të shpenzimeve.