Reshjet e shiut detyrojnë shtyrjen e punimeve në autostradën Tiranë-Durrës

Moti me reshje ka bërë që Autoriteti Rrugor Shqiptar të shtyjë nisjen e punimeve për riparimin e rrugës Tiranë-Durrës.

Në një njoftim të shpërndarë mëngjesin e sotëm në rrjetet sociale, ARrSh tha se punimet do të nisin të enjten dhe se vijimi i tyre, parashikuar të zgjasë deri më 21 prill, “do të varet nga kushtet e motit”.

Të martën ARrSh tha se do të niste nga sot punimet për shtrimin me asfalt të pjesës së autostradës Tiranë-Durrës nga Qafë Kashari deri te Ura e Dajlanit – rreth 25.5 kilometra.

Ndryshe nga njoftimi i parë, sot ARrSh sqaroi se sipas planit të menaxhimit të trafikut “të rishikuar”, qarkullimi do të bëhet në një korsi të autostradës në varësi të pjesëve ku do të punohet. Për të shmangur vështirësitë, qytetarët këshillohen të ndjekin rrugët dytësore, ose rrugë të tjera alternative.

Të martën ARrSh në planin e menaxhimit të trafikut kishte parashikuar dalje nga autostrada të lëvizjeve për segmentet ku do të punohej – dalje nga segmenti dytësor “Rruga Industriale” për pjesën Qafë Kashar-Vorë.

LEXONI GJITHASHTU:

• Punime në autostradën Tiranë-Durrës, nga nesër devijohet qarkullimi drejt Vorës