Restaurohet “Vdekja e kalit”, tashmë filmi mund të udhëtojë nëpër festivale e kinema

Pas 29 vitesh qëkur është prodhuar, filmi i cili u prit mirë dhe u pëlqye për gjuhën e drejtpërdrejtë ndaj pasojave të komunizmit, pas restaurimit, tek ngjyrat, pamja dhe audio mund të udhëtojë tani në secilin festival ndërkombëtar.

Regjisori i mirënjohur i filmit, Saimir Kumbaro, përveç emocionit ndan një sugjerim për të rinjtë e apasionuar pas filmit.

“Të rinjve ju jap sugjerim që të gjejnë fabula, sa më shumë fabula interesante, aq më me interes del filmi”, u shpreh regjisori Saimir Kumbaro.

Për protagonistin në atë prodhim, aktorin Timo Fllokon, restaurimi është një shpëtim për filmin, i cili mund të kishte njohur suksese nëse pamja dhe audio dhe teknologjia që është punuar do të ishte më e mirë.

“Ismaili e pa këtë film dhe i pëlqeu. Ai tha se do të bisedonte me drejtorin ekzekutiv në Festivalin e Kanës. Ata e panë filmin, mirëpo thanë se filmi është interesant për temën që trajton por nga pikëpamja teknike, si zë dhe si figurë, është i pashfaqshëm”, u shpreh aktori Timo Flloko.

Agroni, njeriu i drejtë në atë film, është një nga rolet më të dashura për Timo Fllokon.

Faza e parë e restaurimit, u mundësua nga restauratori Shai Drori në Izrael, në saj të një marrëveshje të Arkivit të filmit me Ambasadën e Israelit, ndërsa faza e dytë u mundësua nga kineasti australian Steven Kastrissios, me mbështetje të Shoqatës së Kinematekave Evropiane, teksa vetë arkivi qendror shtetëror i filmit nuk ka asnjë fond për restaurime, edhe pse shumë tituj të tjerë janë në pritje të ndërhyrjeve për mirëmbajtjeje.

LEXONI GJITHASHTU:

• Fituesit e filmit në Venecia, filmi shqiptar ‘Vera andrron detin’ fiton dy çmime