Rezoluta e kuvendit nxit SPAK-un për çështjet me interes publik

Hetimi i çështjeve me interes publik dhe zyrtarëve të lartë I lihet si prioritet Prokurorisë së Posaçme Antikorrupsion nga Kuvendi i Shqipërisë.

Në Rezolutën e përvitshme që miratohet nga Kuvendi për institucionet e pavarura, për SPAK-un listohen 17 prioritete.

Në mesin e këtyre detyrave, me rëndësi Kuvendi thekson që SPAK duhet të ketë një vëmendje të veçantë për çështjet e korrupsionit, duke kërkuar që hetime të mos ndikohen nga koha se kur mund të jenë kryer shkeljet e ligjit.

“I kërkohet institucionit të nxisë prokurorët dhe hetuesit e SPAK-ut, sidomos drejtuesit e tyre për të pasur më shumë fokus, përgjegjshmëri dhe hetime kryesisht dhe proaktive në çështjet e korrupsionit në nivelin e zyrtarëve të lartë, me prioritet çështjet me interes të veçantë publik, pavarësisht kohës së kryerjes së tyre dhe personave të përfshirë në to, për të cilat mbetet ende e fortë pritshmëria dhe shpresa e qytetarëve dhe partnerëve ndërkombëtarë për respektimin e barazisë para ligjit nga institucionet e reja të drejtësisë, dhe veçanërisht nga SPAK-u.”

Në pikat e tjera, Kuvendi i kërkon SPAK-ut që të ecë përpara me plotësimin e organikës për të pasur një trupë të plotë hetimore dhe për të rritur numrin e çështje që dërgohen në gjykatë.

LEXONI GJITHASHTU:

• Rezoluta e Kuvendit për KQZ: Partitë të zbardhin shpenzimet e fushatës