Rikonstruksioni i burgut të Fushë-Krujës, transferohen 142 të dënuar dhe paraburgosur

142 të dënuar dhe paraburgosur janë transferuar nga Institucioni i Ekzekutimit të Vendimeve Penale në Fushë-Krujë drejt burgjeve të Peqinit dhe Durrësit, në kuadër të punimeve për rikonstruksionin e këtij institucioni.

Burime zyrtare bëjnë me dije se transferimi u krye nën masa të shtuara sigurie. Konkretisht, 85 persona janë dërguar në IEVP Peqin, ndërsa 57 të tjerë në IEVP Durrës. Operacioni u shoqërua me angazhimin e forcave të shumta policore, përfshirë njësi operacionale dhe speciale.

Në terren u angazhuan rreth 340 punonjës policie dhe 48 automjete, ndërsa autoritetet përdorën edhe mjete teknologjike për monitorimin e procesit, si dronë për vëzhgim ajror dhe sisteme komunikimi dixhital. Pamjet nga kamerat e trupit dhe automjeteve u monitoruan në kohë reale për të garantuar sigurinë gjatë lëvizjes.

Operacioni u koordinua me strukturat ligjzbatuese përgjatë itinerarit, përfshirë policinë e Tiranës, Elbasanit dhe Durrësit, si dhe prokuroritë përkatëse.

Sipas të dhënave, të dyja autokolonat kanë mbërritur pa incidente në destinacionet përkatëse, ku janë ndjekur procedurat standarde për pritjen dhe sistemimin e të dënuarve dhe paraburgosurve.

Punimet për rikonstruksionin e burgut të Fushë-Krujës pritet të vijojnë, ndërsa autoritetet sigurojnë se masat për ruajtjen e sigurisë dhe respektimin e të drejtave të personave të privuar nga liria do të vijojnë gjatë gjithë procesit.