Rimëkëmbja e turizmit, Shqipëria, ndër 10 vendet me rënien më të madhe në Evropë

Pandemia e COVID -19 i dha një goditje të rëndë sektorit të turizmit në të gjithë botën, pa përjashtuar këtu edhe vendin tonë.

Vitin që shkoi gjatë sezonit turistik, numri i turistëve që vizituan Shqipërinë regjistroi një rënie prej rreth 60% krahasuar me të njëjtën periudhë në vitin 2019.

Megjithatë, këtë vit, sezoni turistik vjen me perceptime optimiste pas nisjes së procesit të vaksinimit, edhe pse operatorët turistikë kanë shprehur disa herë nevojën për një mbështetje nga ana e shtetit shqiptar. Në këtë kuadër, Ministria e Turizmit dhe Mjedisit ka bërë të ditur se do të bashkë-financojë projekte në sektorin turistik duke vënë në dispozicion, për vitin 2021 një fond prej 30 milionë lekësh.

Sipas Ministrisë, do të mbështeten me fonde deri në masën 50% nga buxheti i shtetit ato projekte të cilat synojnë promovimin e destinacioneve turistike dhe të vlerave të veçanta të produkteve dhe atraksioneve turistike.