Rimëkëmbja ekonomike në Kosovë, ministri Murati paralajmëron krijimin e një pakoje të re dhe rishikim buxheti

Ministri i Financave dhe Punës në Kosovë, Hekuran Murati, paralajmëroi një pako të re të rimëkëmbjes ekonomike, paralelisht me rishikimin e buxhetit, për të cilët tha se shumë shpejt do të jenë në Kuvend për votim.

Në seancën e djeshme të Kuvendit të Kosovës, ku u diskutua për ekonominë si pasojë e pandemisë COVID-19, Hekuran Murati theksoi se me uljen e shifrave do të mund të bëhet edhe rimëkëmbja ekonomike.

“Ne jemi në përgatitje, shumë shpejtë do ta keni edhe rishikimin e buxhetit. Ka qenë e pamundur edhe të bëhet pako e rimëkëmbjes ekonomike pa e ditë hapësirën fiskale, është dashur t’i monitorojmë të hyrat, shpenzimet që ta kemi të qartë çfarë hapësire fiskale mund të përdorim për të krijuar këtë pako të rimëkëmbjes. Shumë shpejtë paralelisht do t’i kemi të dyja”, u shpreh z. Murati.