Rindërtimi, Qeveria i kalon 30 mln $ Fondit Shqiptar të Zhvillimit

Arben Ahmetaj, zv.kryeministër dhe ministër për Rindërtimin ka bërë të ditur se në mbledhjen e dytë të qeverisë së re janë miratuar disa marrëveshje.

Z. Ahmetaj ka drejtuar mbledhjen e Këshillit të Ministrave në mungesë të kryeministrit, Edi Rama që ndodhet në SHBA.

Zv.kryeministri bëri me dije se vendimi më i rëndësishëm ishte për rindërtimin ku i është kaluar një fond prej 30 milionë dollarë Fondit Shqiptar të Zhvillimit.

Ministri për Rindërtimin theksoi se ky fond do të përshpejtojë procesin e rindërtimit të banesave të dëmtuara nga tërmeti i fundit të vitit 2019.

Ai përmendi se procesi i rindërtimit do të përmbyllet në shtator 2022.

Ndonëse kanë kaluar gati dy vite nga tërmeti, ende ka shumë qytetarë që presin të marrin kompensimin për rindërtimin e banesës ndërsa përfundimi i procesit për rindërtimin duket ende shumë larg.

Tërmeti i 26 nëntorit 2019 me fuqi 6.4 magnitudë shkaktoi 51 persona të vdekur dhe mbi 3 mijë të plagosur.

Ky ishte tërmeti më i fortë që ka goditur Shqipërinë në më shumë se 40 vite dhe ishte tërmeti më vdekjeprurës në të gjithë botën për 2019.

Nga lëkundjet e forta që zgjatën 50 sekonda u dëmtuan mbi 14 mijë ndërtesa dhe kostoja e u përllogarit 844 milionë euro.

Qeveria shqiptare mori një ndihmë prej mbi 1 miliard euro nga donatorët e huaj në formë granti dhe kredia për rindërtimin.