Rindërtimi, qeveria miraton fond shtesë për familjet e pastreha

Qeveria ka miratuar një shtese fondi në buxhetin e vitit 2021 për subvencionimin e pagesave të qirasë për familjet e mbetura pa strehë nga tërmeti i 26 nëntorit 2019.

Në programin e strehimit janë shtuar 800 milionë lekë, shumë që do të mbulojë pagesat e qirasë për ato familje që ende nuk u është ndërtuar banesa e premtuar nga qeveria.

Në mungesë të kryeministrit, Edi Rama vendimet janë marrë nga zv.kryeministri dhe ministri i Rindërtimit, Arben Ahmetaj.

Në mbledhjet e 22 shtatorit, qeveria miratoi kalimin e një fond prej 30 milionë dollarë Fondit Shqiptar të Zhvillimit për procesin e rindërtimit.

Ndonëse kanë kaluar gati dy vite nga tërmeti, ende ka shumë qytetarë që presin të marrin kompensimin për rindërtimin e banesës ndërsa përfundimi i procesit për rindërtimin duket ende shumë larg.

Qeveria “Rama” është zotuar për përmbylljen e procesit të rindërtimit në shtator 2022.

Tërmeti i 26 nëntorit 2019 me fuqi 6.4 magnitudë shkaktoi 51 persona të vdekur dhe mbi 3 mijë të plagosur.

Qeveria shqiptare mori një ndihmë prej mbi 1 miliard euro nga donatorët e huaj në formë granti dhe kredia për rindërtimin.